ఆంధ్ర‌ప్ర‌దేశ్ ముఖ్యమంత్రి జగన్మోహన్ రెడ్డి ఇవాళ విశాఖలో ప‌ర్య‌టించ‌నున్నారు. రాడిసన్‌ బ్లూ హోటల్‌‌లో జరగనున్న ఇంటర్నేషనల్‌ కమిషన్‌ ఆన్‌ ఇరిగేషన్‌ అండ్‌ డ్రైనేజీ కాంగ్రెస్ ప్లీనరీ ఐసిఐడి కాంగ్రెస్ ప్లీనరీని ఆయ‌న ప్రారంభించనున్నారు.
ఈరోజు ఉదయం 8.05 గంటలకు గన్నవరం నుంచి ప్రత్యేక విమానంలో బయలుదేరి 8.50 గంటలకు విశాఖపట్నం చేరుకుంటారు.
విమానాశ్రయం నుంచి హెలికాప్టర్‌లో రుషికొండకు (ఐటీ హిల్స్‌-3 వద్ద నిర్మించిన హెలిప్యాడ్‌ వద్ద దిగుతారు) వెళతారు. అక్కడ నుంచి రాడిసన్‌ బ్లూ హోటల్‌కు చేరుకుంటారు. కేంద్ర జల సంఘం ఆధ్వర్యంలో ఇంటర్నేషనల్‌ కమిషన్‌ ఆన్‌ ఇరిగేషన్‌ అండ్‌ డ్రైనేజీ (ఐసీఐడీ) సంస్థ నిర్వహించనున్న 25వ ఐసీఐడీ కాంగ్రెస్‌ను సీఎం ప్రారంభిస్తారు. అనంతరం 11.05 గంటలకు హోటల్‌ నుంచి బయలుదేరి రుషికొండ ఐటీ హిల్స్‌కు వెళ్లి హెలికాప్టర్‌లో ఎయిర్‌పోర్టుకు చేరుకుని 11.45 గంటలకు గన్నవరం బయలుదేరి వెళతారు. ఈ కార్యక్రమానికి 90 దేశాల నుంచి 500 మంది ప్రతినిధులు హాజరవుతున్నారు. ఈ నెల 8 వరకు జలవనరుల సంరక్షణ సదస్సు జరగనుంది.