ఆంధ్రప్రదేశ్ ముఖ్యమంత్రిగా బాధ్యతలు చేపట్టిన తర్వాత తొలిసారిగా మంగళగిరిలోని టీడీపీ కేంద్ర కార్యాలయాన్ని చంద్రబాబు సందర్శించారు. ఈ సందర్భంగా సీఎం చంద్రబాబును కలిసేందుకు అభిమానులు, కార్యకర్తలు పెద్ద ఎత్తున టీడీపీ కార్యాలయానికి చేరుకున్నారు. ఈ క్రమంలో మంగళగిరి తెలుగుదేశం పార్టీ కార్యాలయంలో ఆసక్తికర సన్నివేశం చోటుచేసుకుంది.
మంగళగిరిలో ఏర్పాటుచేసిన సమావేశానికి వచ్చిన ఓ మహిళ ఆనందానికి అవధుల్లేకుండా పోయాయి. తమ అధినేత చంద్రబాబు నాయుడులో హీరోను చూడాలనుకున్న ఆమె ‘పెట్టుకోండి సార్’ అంటూ బ్లాక్ గ్లాసెస్ ఇచ్చారు. ఆమె కోరికను కాదనని ముఖ్యమంత్రి చంద్రబాబు వాటిని ధరించి ఫొటోకు పోజులిచ్చారు. ఆ క్షణం ఉత్సాహానికి గురైన ఆమె జై బాబు అంటూ నినాదాలు చేశారు. ఇందుకు సంబంధించిన ఫోటోలు సోషల్ మీడియాలో వైరల్ గా మారాయి.