అలిపిరి నుంచి తిరుమలకు ‘బస్ డ్రైవింగ్’ పేరిట గూగుల్ ప్లే స్టోర్‌లో ఉన్న గేమ్ యాప్‌ను అధికారులు డిలీట్ చేయించారు. గూగుల్ ప్లే స్టోర్ నుంచి దీన్ని డౌన్ లోడ్ చేసుకోవాలంటే రూ.179 చెల్లించాలని, ఈ యాప్ లోని గేమ్‌లో విజయం సాధిస్తే 20 శ్రీవారి లడ్డూలు గెలుచుకోవచ్చని యాప్ నిర్వాహకులు నెటిజన్లను ఊరించారు.
ఈ గేమ్‌లో తిరుపతి-తిరుమల బస్సులు కొండపైకి వెళ్లేటప్పుడు రోడ్డు పక్కన ఉండే కొండరాళ్లను ఢీకొన్నట్టు, చెట్లను ఢీకొన్నట్టు చూపించారు. అయితే తిరుమల బస్సులు ఈ విధంగా ప్రమాదాలకు లోనైనట్టు చూపించడం హిందూ ధార్మిక సంఘాలను ఆగ్రహానికి గురిచేసింది. దాంతో వారు ఈ విషయాన్ని టీటీడీ దృష్టికి తీసుకెళ్లారు. వెంటనే స్పందించిన టీటీడీ అధికారులు విచారణ చేపట్టగా యాప్ నిర్వాహకుడు సురేష్ పరారయ్యాడు. ఈ నేపథ్యంలో టీటీడీ అధికారులు గూగుల్ ప్లే స్టోర్ సిబ్బందికి విషయం వివరించి యాప్‌ను తొలగించేలా చర్యలు తీసుకున్నారు.
ఈ వార్త కూడా చదవండి: నడిరోడ్డుపై సూపర్ లగ్జరీ బస్సు దగ్ధం