ఆంధ్రప్రదేశ్ లో చెడ్డీ గ్యాంగ్ హల్ చల్ చేస్తోంది. ఇప్పటికే పలు ప్రాంతాల్లో చోరీలకు యత్నించిన గ్యాంగ్.. తాజాగా తాడేపల్లిలో సీఎం జగన్ నివాసానికి కిలోమీటరు దూరంలో ఉన్న నవోదయ కాలనీలోని రెయిన్‌బో విల్లాల్లో చోరీకి యత్నించారు. ఈ ఘటన ఈ నెల 3న జరిగింది. చెడ్డీగ్యాంగ్ విల్లాల్లోకి ప్రవేశించినట్టు సీసీ కెమెరాల్లో రికార్డయింది. తణుకు ఎమ్మెల్యే కారుమూరి నాగేశ్వరరావు, చీరాల మాజీ ఎమ్మెల్యే ఆమంచి కృష్ణమోహన్‌, ఓ వ్యాపారికి సంబంధించిన విల్లాల్లో చోరీకి యత్నించినట్లు తెలుస్తోంది. చెడ్డీగ్యాంగ్‌కు చెందిన వారిగా భావిస్తున్న ఐదుగురు దుండగులు గడ్డపారలతో తలుపులు పగలగొట్టి 37, 39, 44 నంబరు విల్లాల్లోకి చొరబడ్డారు.
అయితే, దుండగులకు అక్కడ ఏమీ లభించకపోవడంతో వస్తువులను చిందరవందర చేసి వెళ్లిపోయారు. ఈ ఘటనపై నిన్నటి వరకు ఎవరూ ఫిర్యాదు అందలేదని పోలీసులు తెలిపారు. అయితే, సీసీ టీవీ కెమెరాలో రికార్డయిన దృశ్యాల ఆధారంగా పోలీసులు ఈ విషయాన్ని గుర్తించారు. ఎమ్మెల్యేలు, ఎమ్మెల్సీలు ఉండే నవోదయ కాలనీలోకి ముఠా ప్రవేశించడం ఆందోళన కలిగిస్తోంది.
కాగా, ఇటీవల కృష్ణా జిల్లా గుంటుపల్లిలో ఓ అపార్ట్‌మెంట్‌లో చెడ్డీ గ్యాంగ్ చోరీకి యత్నించింది. విజయవాడ, గుంటూరు పోలీసులు సమన్వయంతో చెడ్డీ గ్యాంగ్ కోసం గాలిస్తున్నారు.