మంత్రాలయం, జనవరి 25(ఆంధ్ర ప్రభ) : రెండు ఆటోలు ఢీకొని విద్యార్థిని మృతిచెందిన సంఘటన సౌలహళ్లి గ్రామంలో శనివారం చోటుచేసుకుంది. ఈసంద‌ర్భంగా మాధవరం ఎస్ఐ విజయ‌కుమార్ తెలిపిన వివరాల మేరకు.. సుంకేశ్వర గ్రామం నుండి పరమాణుదొడ్డి ఎస్ఎంకెవి హైస్కూల్ కు వెళుతున్న సమయంలో ఆటోలో నలుగురు విద్యార్థులు సౌలహల్లి గ్రామం దగ్గర ప్రయాణిస్తున్న సమయంలో కర్ణాటక రాష్ట్రానికి చెందిన ట్రాలీ విద్యార్థినిలు ప్రయాణిస్తున్న ఆటోను వెనుక నుండి ఢీకొట్టింది. దీంతో ముగ్గురికి గాయాలు కాగా, అందులో తీవ్రంగా గాయపడ్డ అనూష (15) అనే పదో తరగతి విద్యార్థిని అక్కడికక్కడే మృతిచెందింది.
స్థానికులు వారిని హుటాహుటిన ఎమ్మిగనూరు ప్రభుత్వ ఆసుపత్రికి తరలించారు. తండ్రి గొర్రెల అంజినయ్య, తల్లి గొర్రెల ఈరమ్మల ఏకైక కుమార్తె మృతిచెందడంతో ఆ గ్రామంలో తీవ్ర విషాద ఛాయలు అలుముకున్నాయి. రోడ్డు ప్రమాదంలో మృతిచెందిన 10వ తరగతి బాలిక జి.అనూష మృతదేహానికి ఎమ్మిగనూరు ప్రభుత్వ ఆసుపత్రి వద్ద జిల్లా విద్యాధికారి ఎస్.శ్యామ్యూల్ పాల్ పూలమాల వేసి నివాళులర్పించారు. తమ పిల్లలు చదువుకునేందుకు బస్ సౌకర్యం కల్పించాలని చౌటుపల్లి, సుంకేశ్వరీ గ్రామాల ప్రజలు జిల్లా విద్యాధికారిని కోరారు. ఈ విషయాన్ని జిల్లా కలెక్టర్ దృష్టికి తీసుకెళ్తానని హామీ ఇచ్చారు.
