ఆంధ్ర ప్రభ స్మార్ట్ – అమరావతి, హైదరాబాద్ : తొలి ఏకాదశి, మొహరం పండుగల సందర్భంగా ఎపి , తెలంగాణా ప్రజలకు ఆయా ముఖ్యమంత్రులు చంద్ర బాబు,. రేవంత్ రెడ్డి శుభాకాంక్షలు తెలిపారు.
ఆషాఢంలో వచ్చే ఏకాదశిని తెలంగాణ ప్రజలందరూ ఏడాదిలో వచ్చే పండుగలకు ఇదే మొదటి పండుగగా జరుపుకుంటారని తెలంగాణ ముఖ్యమంత్రి రేవంత్ అన్నారు. తొలి ఏకాదశి రాష్ట్ర ప్రజల జీవితాల్లో సుఖ సంతోషాలు, సకల శుభాలు కలిగించాలని ప్రార్థించారు. ఇచ్చిన మాట ప్రకారం రూ.రెండు లక్షల రైతుల రుణమాఫీకి రాష్ట్ర ప్రభుత్వం తీసుకున్న నిర్ణయంతో రైతు కుటుంబాలన్నీ రుణ విముక్తి పొందాలని, ఏకాదశి పండుగను ప్రతి ఇంటా ఆనందంగా జరుపుకోవాలని ముఖ్యమంత్రి తన ఆకాంక్షను వ్యక్తం చేశారు..
ఇక త్యాగనిరతికి, అనిర్వచనీయ సహనానికి మొహరం ప్రతీకగా నిలుస్తుందని ముఖ్యమంత్రి రేవంత్ రెడ్డి తెలిపారు. ముహమ్మద్ ప్రవక్త మనవడు హజ్రత్ ఇమామ్ హుస్సేన్ బలిదానాన్ని సంస్మరణగా మొహర్రం జరుపుకుంటున్నామని పేర్కొన్నారు. తరతరాలుగా రాష్ట్రంలో హిందూ ముస్లింలు కలిసి పీర్ల ఊరేగింపు నిర్వహిస్తారని గుర్తు చేసుకున్నారు. రాష్ట్రంలో గంగా, జమున, తెహజీబ్‌కి గొప్ప నిదర్శనం పీర్ల ఊరేగింపు అన్న రేవంత్.. కులమతాలకు అతీతంగా ప్రజల మధ్య సఖ్యతకు, ఐక్యతకు వారధిగా మొహరం నిలుస్తుందని అభిప్రాయపడ్డారు.
ఎపి ముఖ్యమంత్రి శుభాకాంక్షలు
ఏపీ ముఖ్యమంత్రి టిడిపి జాతీయ అధ్యక్షుడు నారా చంద్రబాబు నాయుడు ముస్లిం సోదరులకు, హిందువులకు ఒకే రోజు కలిసి వచ్చిన రెండు విశేష పర్వదినాల సందర్భంగా శుభాకాంక్షలు తెలియజేశారు. ఎక్స్ వేదికగా స్పందించిన చంద్రబాబు పవిత్ర మొహర్రం పుణ్య దినాల సందర్భంగా ముస్లిం సోదర సోదరీమణులకు శుభం కలిగేలా చూడాలని ఆ అల్లాహ్ ను కోరుకుంటున్నాను అంటూ పేర్కొన్నారు..
హిందువులకు ఎంతో ప్రత్యేకమైన తొలి ఏకాదశి పండుగ సందర్భంగా ప్రజలందరికీ శుభాకాంక్షలు. నియమనిష్టలతో ఉపవాస దీక్షలు చేస్తున్న భక్తులందరికీ ఆ భగవంతుడు ఆనంద, ఆరోగ్య, ఐశ్వర్యాలను ప్రసాదించాలని కోరుకుంటున్నాను. అని సిఎం తెలిపారు.