తిరుపతి ప్రతినిధి (ఆంధ్రప్రభ): సీఎం చంద్రబాబు నాయుడు, ఐటీ శాఖా మంత్రి నారా లోకేష్ బుధవారం రాత్రి నారావారిపల్లె చేరుకున్నారు. చంద్రగిరి ఎమ్మెల్యే పులివర్తి నాని, మాజీ ఎమ్మెల్యే ఎస్సీవీ నాయుడు, ప్రజాప్రతినిధులు వారికి స్వాగతం పలికారు. చంద్రగిరి నియోజకవర్గం మాజీ ఎమ్మెల్యే నారా రామ్మూర్తి నాయుడు కర్మక్రియలు గురువారం ఉదయం నారావారిపల్లిలో జరగనున్నాయి. కర్మ క్రియలలో పాల్గొనడానికి సీఎం చంద్రబాబు నాయుడు నారావారిపల్లె చేరుకున్నారు.
రేణిగుంట విమానాశ్రయంలో చంద్రబాబుకు స్వాగతం
నారావారి పల్లెలో జరిగే చంద్రగిరి మాజీ ఎమ్మెల్యే నారా రామ్మూర్తి నాయుడు కర్మ క్రియలలో పాల్గొనడానికి గన్నవరం నుంచి విమానం లో రేణిగుంట విమానాశ్రయానికి చేరుకున్న ముఖ్యమంత్రి చంద్రబాబు కు సాదర స్వాగతం లభించింది. టీటీడీ ఈవో శ్యామల రావు, కలెక్టర్ వెంకటేశ్వర్, ఎస్పీ సుబ్బరాయుడు, టీటీడీ సీవీఎస్వో శ్రీధర్, అదనపు ఈఓ వెంకయ్య చౌదరి, ఎమ్మెల్యేలు బొజ్జల సుధీర్ రెడ్డి, కోనేటి ఆదిమూలం, ఆరణి శ్రీనివాసులు, భాను ప్రకాష్, థామస్, ఎమ్మెల్సీ బల్లి కళ్యాణ చక్రవర్తి, ప్రజాప్రతినిధులు, అధికారులు ముఖ్యమంత్రికి స్వాగతం పలికారు. ముఖ్యమంత్రితో పాటు మంత్రి నారాలోకేష్ ఉన్నారు. అనంతరం ముఖ్యమంత్రి రేణిగుంట విమానాశ్రయం నుంచి నారావారి పల్లెకు రోడ్డు మార్గాన బయలుదేరారు.