తిరుపతి (రాయలసీమ ప్రభ న్యూస్ బ్యూరో ) : కేంద్ర ప్ర‌భుత్వ ఉద్యోగులు, విశ్రాంతి ఉద్యోగుల చిరకాల స్వప్న మైన సెంట్ర‌ల్ గ‌వ‌ర్న‌మెంట్ హెల్త్ స్కీమ్ (సి.జి హెచ్ ఎస్) వెల్నెస్ సెంటర్ తిరుపతి లో ఏర్పాటు కానున్నది. కేంద్రం మంజూరు చేయడంతో ఈ సెంటర్ ఏర్పాటుకు అవసరమైన భవనం ఎంపిక కోసం హైదరాబాద్ నుంచి సీజీహెచ్ఎస్ అడిష‌న‌ల్‌ డైరెక్ట‌ర్ ల‌క్ష్మ‌య్య, ఆయ‌న బృందం ఈరోజు తిరుపతికి వచ్చింది.
ఈ సెంటర్ ఏర్పాటు కోసం విశేష కృషి చేసిన తిరుపతి ఎంపీ డాక్ట‌ర్ మ‌ద్దిల గురుమూర్తితో చ‌ర్చించిన ఆ బృందం సభ్యులు న‌గ‌రంలోని ప‌లు ఆస్ప‌త్రులు, కేంద్ర ప్ర‌భుత్వ భ‌వ‌నాల‌ను ప‌రిశీలించారు. కేంద్ర ప్ర‌భుత్వానికి సంబంధించి 24 విభాగాల వ‌ర్కింగ్‌ ఉద్యోగులు, విశ్రాంత ఉద్యోగుల‌కు ఆరోగ్య కేంద్రం లేదు. తిరుపతిలో ఏర్పాటు చేసేందుకు స్థానిక ఎంపీ డాక్ట‌ర్ మ‌ద్దిల గురుమూర్తి కేంద్ర ప్ర‌భుత్వంతో ప‌లు ద‌ఫాలు చ‌ర్చించారు.
సెంట్ర‌ల్ గ‌వ‌ర్న‌మెంట్ రిటైర్డ్ అండ్ స‌ర్వింగ్ ఎంప్లాయీస్ వెల్ఫేర్ కోఆర్డినేష‌న్ క‌న్వీన‌ర్లు దామోద‌రం, రంగ‌య్య సహకారం తో హెల్త్ కేంద్రం ఏర్పాటు ఆవ‌శ్య‌క‌త‌ను కేంద్రానికి ఎంపీ వివ‌రించారు. తిరుపతి ప‌రిధిలో కేంద్ర ప్ర‌భుత్వ ప‌రిధిలో వివిధ శాఖ‌ల‌కు సంబంధించి 15 వేల మంది రెగ్యుల‌ర్‌, రిటైర్డ్ ఉద్యోగుల కుటుంబాల‌కు ప్ర‌యోజ‌నం క‌లిగించే విష‌యాన్ని కేంద్ర ప్ర‌భుత్వ పెద్ద‌ల దృష్టికి తీసుకెళ్లారు. దీంతో తిరుపతిలో సి జి హెచ్ ఎస్ వెల్నెస్ సెంటర్ ఏర్పాటు చేయడానికి కేంద్ర వైద్యారోగ్య‌శాఖ ముందుకొచ్చింది.
ఈ కేంద్రాన్ని ఏర్పాటుకు అవసరమైన భవనాల పరిశీలనలో సీజీహెచ్ఎస్ అడిష‌న‌ల్‌ డైరెక్ట‌ర్ ల‌క్ష్మ‌య్య (హైదరాబాద్ ) నేతృత్వంలో బృందం సభ్యులు పాల్గొన్నారు. న‌గ‌రంలోని బీఎస్ఎన్ఎల్ భవనం, ప‌ద్మావ‌తి ఆస్ప‌త్రి, అలాగే రుయా, ఈఎస్ఐ ఆస్ప‌త్రుల‌ను ప‌రిశీలించారు. ఎక్క‌డ ఏర్పాటు చేయాల‌నే విష‌యమై ఉన్న‌తాధికారులు తుది నిర్ణ‌యం తీసుకోనున్నారు.
ఈ హెల్త్ సెంటర్ ఏర్పాటుతో కేంద్ర ప్ర‌భుత్వ ఉద్యోగులు, విశ్రాంత ఉద్యోగులు, వారి కుటుంబ సభ్యులు ఆరోగ్య ప‌రీక్ష‌ల కోసం బెంగ‌ళూరు, చెన్నై త‌దిత‌ర సుదూర ప్రాంతాల‌కు వెళ్లాల్సిన అవ‌స‌రం లేకుండా పోతుంది. తిరుపతిలో ఏర్పాటు అయ్యే సి జి హెచ్ ఎస్ వెల్నెస్ సెంటర్ రాయలసీమ ప‌రిధిలోని కేంద్ర ప్ర‌భుత్వ ఉద్యోగులు, విశ్రాంతి ఉద్యోగులు, వారి కుటుంబ సభ్యుల‌కు వైద్యం అందుబాటులోకి రానుంది.