ఏపీ ఓటర్ల జాబితాను ఎన్నికల సంఘం రెడి చేసింది. దీనికి సంబంధించి రాష్ట్ర ఎన్నికల ప్రధానాధికారి ముఖేశ్‌ కుమార్‌ మీనా ముసాయిదా ఓటర్ల జాబితా-2024ను విడుదల చేశారు. ముసాయిదా ఓటర్ల జాబితాపై ఏవైనా అభ్యంతరాలుంటే డిసెంబర్‌ తొమ్మిదో తేదీ వరకు అభ్యంతరాలను స్వీకరించనున్నట్లు తెలిపారు. ఏపీలో మొత్తం ఓటర్లు 4,01,53,292 మంది ఉండగా ఇందులో పురుషులు 1,98,31,791, మహిళలు 2,03,85,851 మంది ఉన్నారు. అనంతపురం జిల్లాలో అత్యధికంగా 19,79,775 ఓటర్లు ఉండగా అల్లూరి సీతారామరాజు జిల్లాలో అత్యల్పంగా 7,40,857 ఓటర్లు ఉన్నారు.
ముసాయిదా జాబితా ప్రకారం 4,02,21,450 మంది ఓటర్లున్నట్లు తేలింది. దీనిపై అభ్యంతరాలు, మార్పులు, చేర్పుల అనంతరం 2024 జనవరి 5వ తేదీన తుది జాబితాను విడుదల చేస్తారు. రాష్ట్రంలో పురుషులకంటే మహిళా ఓటర్లే అధికం! పురుష ఓటర్ల సంఖ్య 1,98,31,791 కాగా… మహిళా ఓటర్ల సంఖ్య 2,03,85,851. అంటే… పురుషులకంటే మహిళా ఓట్లు 6,17,458 ఎక్కువ. ఏపీలో ముసాయిదా ఓటర్ల జాబితాను ఎన్నికల సంఘం విడుదల చేసింది. రాష్ట్రంలో సాధారణ ఎన్నికల నిర్వహణకు మార్చిలో నోటిఫికేషన్‌ వచ్చే అవకాశం ఉందని రాష్ట్ర ప్రధాన ఎన్నికల అధికారి ముకేష్‌కుమార్‌ మీనా తెలిపారు. డిసెంబరు 9 వరకు ఎవరైనా తమ అభ్యంతరాలు తెలిపితే.. డిసెంబరు 26 లోగా వాటిని పరిష్కరిస్తామన్నారు. ఆ తర్వాత తుది ఓటర్ల జాబితాను 2024 జనవరి 5న ప్రకటిస్తామన్నారు. ఓటర్ల జాబితాపై రాజకీయ పార్టీలు కొన్ని అభ్యంతరాలు తెలిపాయని.. సుమారు 10 లక్షల బోగస్‌ ఓట్లను గుర్తించి తొలగించామని.. ఈ ప్రక్రియ నిరంతరం కొనసాగుతుందన్నారు.
ఓటర్ల జాబితా సవరణల విషయంలో ఎవరైనా అక్రమాలకు ప్రయత్నించినట్లు తమ దృష్టికి వస్తే కచ్చితంగా చర్యలు తీసుకుంటామన్నారు. పర్చూరు నియోజకవర్గం పరిధిలో ఓటర్ల జాబితా తయారీలో పోలీసు సిబ్బంది జోక్యం చేసుకున్నట్లు ఆరోపణలు రావడంతో చర్యలకు ఆదేశించామన్నారు. ఎన్నికల సంఘానికి ఆన్‌లైన్‌ ద్వారా ఫిర్యాదు అందినా కచ్చితంగా స్పందిస్తామన్నారు. 2023 జనవరి 1 నాటికి 18 ఏళ్ల వయసు నిండిన వారెవరైనా ఓటరుగా నమోదయ్యేందుకు గతంలో దరఖాస్తు చేసుకోపోతే డిసెంబరు 9 వరకు దరఖాస్తు చేసుకునే వీలుంది అన్నారు. 2024 ఏప్రిల్‌ 1 లేదా జులై 1 లేదా అక్టోబరు 1 నాటికి 18 ఏళ్లు నిండేవారెవరైనా కూడా ముందస్తు దరఖాస్తు చేసుకోవచ్చని తెలిపారు.