తిరుపతి (రాయలసీమ ప్రభ వెబ్ ప్రతినిధి) : ఇనుప గొడ్డళ్లతో కడప జిల్లా ఫారెస్టు పరిధిలో అక్రమంగా అడవుల్లోకి చొరబడుతున్న 9మందిని రాత్రి అరెస్ట్ చేసినట్టు ఎర్రచందనం అక్రమ నిరోధక టాస్క్ ఫోర్సు పోలీసులు శనివారం తెలిపారు. టాస్క్ ఫోర్సు డీఎస్పీ మురళీధర్ అధ్వర్యంలో ఆర్ఎస్ఐ ఆలీ బాషా, మురళీధర్ రెడ్డి టీమ్ కడప జిల్లా రాజంపేట చేరి, నందలూరు వైపు వెళుతుండగా, సిద్దవటం బాకరాపేట రేంజి మండపల్లి వద్ద కొందరు వ్యక్తులు అడవుల్లోకి ప్రవేశించేందుకు ప్రయత్నిస్తున్నారు.
వీరిని చుట్టుముట్టి వారిని అదుపులో తీసుకుని వారి వద్ద ఉన్న ఇనుప గొడ్డళ్లు, ఒక మోటారు సైకిల్ ను స్వాధీనం చేసుకున్నారు. వారిని సిద్దవటం మండలానికి చెందిన మాచుపల్లి మహేష్ (30), నాసరి సుబ్బరాయుడు (46), పుల్లంపేటకు చెందిన కత్తి నాగరాజు (34), కుమ్మితి గంగాదర్ (40), షేక్ హుసేన్ బాషా (30), దూదేకుల చిన్న హుసేన్ (34), దుదేకుల హుసేనయ్య (53), దూదేకుల హుస్సేని (31), అనకల బాల సుంకన్న (35) గా గుర్తించారు. ఎర్రచందనం చెట్లను నరికేందుకే వెళ్తున్న వారిపై తిరుపతి టాస్క్ ఫోర్స్ పోలీసు స్టేషన్ లో కేసు నమోదు చేసిన ఎస్ఐ బాలకృష్ణ దర్యాప్తు చేస్తున్నారు.