( ఆంధ్రప్రభ, ఎన్టీఆర్ బ్యూరో ) : గంజాయి అక్రమ రవాణా, క్రయవిక్రయాలు చేస్తున్న వారిపై ఎన్టీఆర్ జిల్లా పోలీసులు ఉక్కుపాదం మోపుతున్నారు. ముఖ్యంగా జల్సాలకు అలవాటు పడి, ఈజీ మనీ కోసం పెద్ద ఎత్తున గంజాయిని కొనుగోలు చేసి విజయవాడ నగరంలో విక్రయిస్తున్న ముఠాపై నిఘా ఉంచిన సిటీ టాస్క్, ఫోర్స్ లాండ్ ఆర్డర్ కలిసి జాయింట్ ఆపరేషన్ నిర్వహించి 12మంది నిందితులను అదుపులోకి తీసుకున్నారు. వీరి నుండి సుమారు లక్షన్నర విలువ గల 23 కేజీల గంజాయిని స్వాధీనం చేసుకున్నారు.
అరెస్టు చేసిన వారిలో కృష్ణా జిల్లా కంకిపాడు గ్రామానికి చెందిన పెమ్మాడి మహేష్, తన్నేరు రోహిత్ కుమార్, కాటూరి మహేష్, బొడ్డు ఉమేష్, కృష్ణా జిల్లా తాడిగాడప గ్రామానికి చెందిన కొమ్మూరు సాయికిరణ్, విజయవాడ అయోధ్య నగర్ ఏరియాకు చెందిన వల్లభనేని సాయి శ్రీరామ్, విజయవాడ భవానిపురం ఏరియాకు చెందిన షేక్ అక్బర్ బాషా, కృష్ణా జిల్లా పెనమలూరు గోసాలకు చెందిన పొలాన కిరణ్, ఖగ్గా వెంకట తరుణ్ లతో పాటు గుణదల పోలీస్ స్టేషన్ లలో కేసులు నమోదై ఉన్న విజయవాడ లెనిన్ నగర్ కు చెందిన నాదెళ్ళ తరుణ్ చౌదరి, విజయవాడ మురళి నగర్ కు చెందిన షేక్ ఫాతిమాలను పోలీసులు అదుపులోకి తీసుకున్నారు. సత్యనారాయణపురం పోలీస్ స్టేషన్ కేసుకు సంబంధించి విజయవాడ పూర్నానంధపేటకు చెందిన దుంగల మురళిని అదుపులోకి తీసుకున్నారు.