విశాఖపట్నం: ఈ నెల 21న విశాఖపట్నంలో జరగనున్న అంతర్జాతీయ యోగా దినోత్సవం (International Yoga Day 2025) ఏర్పాట్లపై ముఖ్యమంత్రి నారా చంద్రబాబు నాయుడు ఈరోజు (జూన్ 16న) సమీక్ష నిర్వహించారు. ప్రధాని నరేంద్ర మోదీ ఈ వేడుకకు హాజరవుతున్న నేపథ్యంలో, ఈ కార్యక్రమాన్ని ప్రపంచస్థాయిలో గుర్తింపు పొందేలా చేయాలని సీఎం అధికారులను ఆదేశించారు.
ఈ సందర్భంగా ముఖ్యమంత్రి మాట్లాడుతూ.. యోగా అనేది కేవలం శారీరక వ్యాయామం మాత్రమే కాదు, అది మన ఆరోగ్యానికి, మానసిక ప్రశాంతతకు మార్గదర్శకమవుతుంది. ప్రతి ఒక్కరి జీవితంలో యోగా ఒక భాగంగా మారాలని, ఈ కార్యక్రమం లక్షలాది మందిలో స్పూర్తిని రగిలించాలన్నదే తమ సంకల్పమని తెలిపారు.
ఈ వేడుకలను ‘యోగఆంధ్ర–2025’ పేరుతో ప్రత్యేకంగా బ్రాండింగ్ చేస్తూ, ఆంధ్రప్రదేశ్‌ను యోగా కేంద్రంగా అభివృద్ధి చేయడమే లక్ష్యమని సీఎం చెప్పారు. విశాఖపట్నంలోని ఆర్కే బీచ్ నుండి భీమిలి వరకు 26.5 కిలోమీటర్ల బీచ్ రోడ్‌ను యోగా వేడుకలకు వేదికగా ఎంపిక చేసినట్లు తెలిపారు.
ఈ మార్గాన్ని మొత్తం 127 సెగ్మెంట్లుగా విభజించి, ప్రతి సెగ్మెంట్‌కు ప్రత్యేకాధికారులను నియమించాల‌ని సూచించారు. వాలంటీర్లు, వైద్య సదుపాయాలు, లైఫ్ గార్డులు, ట్రాన్సపోర్ట్ లింకులు వంటి అన్ని అవసరమైన ఏర్పాట్లు చేయాలని స్పష్టంగా ఆదేశించారు.
రాష్ట్రవ్యాప్తంగా 2 కోట్ల మందిని యోగా కార్యక్రమాల్లో భాగస్వాములుగా చేసే దిశగా చర్యలు తీసుకోవాల‌న్నారు. విశాఖపట్నంలో కనీసం 5 లక్షల మంది ప్రత్యక్షంగా పాల్గొనేలా ఏర్పాట్లు చేయాల‌న్నారు. ఘనతతో గిన్నిస్‌ వరల్డ్‌ రికార్డు సాధించడమే ప్రభుత్వ లక్ష్యమని వివరించారు.
భద్రత పరంగా ప్రభుత్వం పటిష్ట ఏర్పాట్లు చేస్తోందని సీఎం తెలిపారు. మొత్తం 8 వేల మంది పోలీసు సిబ్బంది, 1,200 సీసీ కెమెరాలు, డ్రోన్‌ల ద్వారా నియంత్రణ చేప‌ట్టాల‌ని సూచించారు. వర్షం వంటి అనుకోని పరిస్థితులకు ముందస్తు ప్రణాళికగా AU ఇంజినీరింగ్ కాలేజ్ గ్రౌండ్‌ను ప్రత్యామ్నాయ వేదికగా సిద్ధం చేసినట్లు పేర్కొన్నారు.
కార్యక్రమానికి పాల్గొనదలచిన వారు QR కోడ్ ఆధారిత రిజిస్ట్రేషన్ ప్రక్రియ ద్వారా నమోదు చేసుకోవచ్చని, లైవ్ మానిటరింగ్ కోసం ప్రత్యేక డిజిటల్ మాడ్యూల్ సిద్ధం చేస్తున్నట్లు తెలిపారు.
ప్రజల గమనాన్ని సమన్వయం చేయడానికి కంట్రోల్ రూమ్‌లు ఏర్పాటు చేసి, ట్రాఫిక్‌ను సజావుగా నడిపేందుకు క్యూఆర్ బేస్డ్ ట్రాకింగ్ సిస్టమ్ అమలు చేయాలని తెలిపారు.
సమీక్ష సమావేశానికి రాష్ట్ర ఉన్నతాధికారులు, జిల్లా కలెక్టర్లు, పోలీసు, ఆరోగ్య, విద్యాశాఖల అధికారులు హాజరయ్యారు. ప్రధాని పర్యటన నేపథ్యంలో ఏర్పాట్లను సూక్ష్మంగా పర్యవేక్షించాలని, ప్రతి అంశాన్ని మైక్రో లెవెల్‌లో అమలు చేయాలని అధికారులకు సీఎం సూచించారు.
