పచ్చని ప్రకృతి మధ్య చిన్నారి పక్షి అందాలు..
- ఉదయపు వెలుగులో బంధించిన అపురూప దృశ్యం
- సోషల్ మీడియాలో వైరల్
హైదరాబాద్, ఆంధ్రప్రభ: ప్రకృతి అందాలను తన కెమెరా కంటితో అద్భుతంగా బంధించే మాజీ ఎంపీ సంతోష్కుమార్ మరోసారి ఆకట్టుకున్నారు. ఆయన తన ఫోటోగ్రఫీ నుంచి తాజాగా పంచుకున్న అందమైన పక్షి చిత్రం సామాజిక మాధ్యమాల్లో వైరల్గా మారుతోంది. పచ్చని ప్రకృతి మధ్య ఓ చిన్న పక్షి హుందాగా నిలిచిన దృశ్యం ప్రకృతి ప్రేమికులను విశేషంగా ఆకర్షిస్తోంది.
తన వారపు ఫోటోగ్రఫీ సంగ్రహంలో భాగంగా ఈ చిత్రాన్ని పంచుకున్న సంతోష్కుమార్, ప్రకృతిలోని చిన్న చిన్న జీవుల్లోనూ ఎంతటి అపూర్వమైన అందం దాగి ఉంటుందో ఈ దృశ్యం చెబుతోందని పేర్కొన్నారు. ఎత్తైన గడ్డిపై చిన్న అతిథిలా వాలిన పక్షి, చుట్టూ విరాజిల్లుతున్న పచ్చదనం చిత్రానికి ప్రత్యేక ఆకర్షణగా నిలిచింది.
ఉదయపు వెలుగులో అపురూప దృశ్యం
ఉదయపు సూర్యకిరణాలు ప్రతి ఈకను, ప్రతి ఆకును తాకుతూ ప్రకృతికి కొత్త జీవం పోస్తున్న సమయంలో ఈ దృశ్యాన్ని కెమెరాలో బంధించినట్లు ఆయన వివరించారు. అడవి గడ్డి మధ్య తనకు సరైన వేదికను ఎంచుకున్నట్లుగా ఆ చిన్న పక్షి నిలిచిన తీరు చిత్రానికి మరింత అందాన్ని తెచ్చిపెట్టింది.
ప్రకృతిలోని గొప్ప అందాలు ఎప్పుడూ పెద్ద దృశ్యాల్లోనే ఉండవని, కొన్నిసార్లు అతి చిన్న జీవరాశుల్లోనూ అద్భుతమైన క్షణాలు కనిపిస్తాయని సంతోష్కుమార్ తన సందేశంలో పేర్కొన్నారు. ప్రకృతిని ఆస్వాదించే వారికి ఈ చిత్రం ప్రత్యేక అనుభూతిని కలిగిస్తోందని నెటిజన్లు స్పందిస్తున్నారు.
ప్రతి వారం తన కెమెరాతో బంధించిన ప్రకృతి దృశ్యాలను పంచుకుంటూ వస్తున్న సంతోష్కుమార్, ఈసారి చిన్న పక్షి అందాలను అభిమానులకు చూపించారు. ప్రకృతి పరిరక్షణ, పచ్చదనం పట్ల తనకున్న ఆసక్తిని ఈ చిత్రాల ద్వారా మరోసారి చాటుకున్నారని పలువురు వ్యాఖ్యానిస్తున్నారు.
హ్యాపీ సండే అంటూ ప్రకృతి ప్రేమికులకు ఆయన శుభాకాంక్షలు తెలిపారు.
