Anant Nag | కన్నడ దిగ్గజ నటుడికి అరుదైన గౌరవం
ఆంధ్రప్రభ, వెబ్‌ డెస్క్‌: ప్రముఖ కన్నడ నటుడు అనంత్ నాగ్‌కు అరుదైన గౌరవం దక్కింది. భారతీయ సినిమాకు ఆయన చేసిన విశిష్ట సేవలకు గుర్తింపుగా 2024 సంవత్సరానికి గానూ ప్రతిష్ఠాత్మక దాదాసాహెబ్ ఫాల్కే అవార్డు అందుకోనున్నారు. ఈ విషయాన్ని కేంద్ర ప్రభుత్వం బుధవారం ప్రకటించింది.
72వ జాతీయ చలనచిత్ర అవార్డుల కార్యక్రమంలో అనంత్ నాగ్‌కు దాదాసాహెబ్ ఫాల్కే అవార్డును ప్రదానం చేయనున్నారు. సెప్టెంబర్ 22న గుజరాత్‌లోని ఏక్తా నగర్ (కేవాడియా)లో ఈ కార్యక్రమం జరగనుంది. రాష్ట్రపతి ద్రౌపది ముర్ము చేతుల మీదుగా జాతీయ చలనచిత్ర అవార్డులను ప్రదానం చేయనున్నట్లు కేంద్ర సమాచార, ప్రసార మంత్రిత్వ శాఖ వెల్లడించింది.
1948 సెప్టెంబర్ 4న జన్మించిన అనంత్ నాగ్.. దక్షిణాది సినీ పరిశ్రమలో తనకంటూ ప్రత్యేక గుర్తింపు తెచ్చుకున్నారు. ఐదు దశాబ్దాలకు పైగా సాగిన సినీ ప్రయాణంలో 300కు పైగా సినిమాల్లో నటించారు. ఇందులో 250కి పైగా కన్నడ చిత్రాలు ఉన్నాయి. హిందీ, తెలుగు, తమిళం, మరాఠీ, మలయాళం, ఇంగ్లిష్ భాషల్లోనూ ఆయన నటించారు.
‘మాల్గుడి డేస్’తోనూ గుర్తింపు..
సినిమాలతో పాటు టెలివిజన్‌లోనూ అనంత్ నాగ్ ప్రేక్షకులను అలరించారు. ఆర్.కే. నారాయణ్ రచనల ఆధారంగా రూపొందిన ప్రముఖ దూరదర్శన్ సీరియల్ ‘మాల్గుడి డేస్’లో ఆయన నటించారు.తన సినీ కెరీర్‌లో అనంత్ నాగ్ ఐదు కర్ణాటక రాష్ట్ర చలనచిత్ర అవార్డులను అందుకున్నారు. 2025లో భారత ప్రభుత్వం ఆయనను పద్మభూషణ్ పురస్కారంతో సత్కరించింది.
భారతీయ సినిమాకు అత్యున్నత గౌరవాల్లో ఒకటి
భారతీయ సినిమాకు చేసిన విశిష్ట సేవలను గుర్తిస్తూ దాదాసాహెబ్ ఫాల్కే అవార్డును అందజేస్తారు. భారతీయ చలనచిత్ర రంగంలో అత్యున్నత గౌరవంగా దీనిని పరిగణిస్తారు. అనంత్ నాగ్‌కు ఈ పురస్కారం ప్రకటించడంతో ఆయన అభిమానులు, సినీ ప్రముఖులు హర్షం వ్యక్తం చేస్తున్నారు.
ప్రధాని మోదీ అభినందనలు
ప్రముఖ కన్నడ నటుడు అనంత్ నాగ్‌కు దాదాసాహెబ్ ఫాల్కే అవార్డు లభించడంపై ప్రధాని నరేంద్ర మోదీ అభినందనలు తెలిపారు. ఈ మేరకు మోదీ సోషల్‌ మీడియా వేదికగా స్పందించారు.అనంత్ నాగ్ ఎన్నో దశాబ్దాలుగా తన సహజ నటన, వైవిధ్యభరితమైన పాత్రలు, అద్భుతమైన ప్రతిభతో భారతీయ సినీ రంగంపై, ముఖ్యంగా కన్నడ చిత్ర పరిశ్రమపై చెరగని ముద్ర వేశారని మోదీ పేర్కొన్నారు.
ఆయన పోషించిన ప్రతి పాత్రకు అరుదైన లోతు, సహజత్వాన్ని తీసుకొచ్చారని ప్రశంసించారు. విభిన్నమైన పాత్రల్లో తన నటనతో ప్రేక్షకులను ఆకట్టుకున్న అనంత్ నాగ్‌కు దక్కిన ఈ గౌరవం పూర్తిగా సముచితమైనదని మోదీ అన్నారు. “అనంత్ నాగ్ వంటి విశిష్ట కళాకారుడికి ఈ ప్రతిష్ఠాత్మక గౌరవం దక్కడం ఎంతో సంతోషకరం. ఆయనకు హృదయపూర్వక అభినందనలు” అంటూ ప్రధాని మోదీ శుభాకాంక్షలు తెలిపారు.
